Түркі елдеріне енді паспортсыз барамыз ба?

Түркі мемлекеттері ұйымына мүше елдер арасында азаматтардың шекарадан ұлттық жеке куәлікпен өтуіне мүмкіндік беретін жаңа жүйе талқыланып жатыр.

Жоба жүзеге асса, Қазақстан, Түркия, Әзербайжан, Қырғызстан және Өзбекстан азаматтарының өзара сапары айтарлықтай жеңілдеуі мүмкін.

Яғни кейбір бағыттарда шетелдік паспорттың орнына жеке куәлік жеткілікті болуы ықтимал.

Мұндай тәжірибе қазірдің өзінде Түркия мен Әзербайжан арасында бар. Екі елдің азаматтары 2021 жылдан бері тікелей сапар кезінде биометриялық жеке куәліктерін пайдалана алады.

Енді осы тәжірибені Түркі мемлекеттері ұйымы аясында кеңейту мәселесі қарастырылып отыр. Бұл бастама азаматтардың еркін қозғалысын жеңілдетіп, туризм мен экономикалық байланыстарды дамытуға ықпал етуі мүмкін.

Алайда әзірге «2027 жылғы 1 қаңтардан бастап барлық түркі елдеріне жеке куәлікпен кіруге болады» деген нақты ресми шешім жоқ.

Сондықтан жобаның іске қосылатын мерзімі мен оған қатысатын мемлекеттердің нақты тізімі ресми келісімнен кейін белгілі болады.