Қазақстандағы ресейлік компания қызметкерлері қазақ тілін үйреніп жатыр

Fix Price дүкендер желісі ішкі оқу бағдарламаларына қазақ тілін енгізуде. Компанияның баспасөз қызметінің мәліметінше, 2022 жылдан бері Қазақстандағы 1200-ден астам қызметкер мемлекеттік тілде міндетті курстардан өткен, деп хабарлайды Altyn-orda.kz.

Бағдарлама аясында қызметкерлер жұмыс стандарттарын, нұсқаулықтарды, қауіпсіздік ережелерін және күнделікті қызметке қажет басқа да материалдарды меңгереді. Барлық оқу базасы Қазақстанға бейімделіп, қазақ тіліне аударылған. Сонымен қатар, әр қызметкер өзіне ыңғайлы тіл нұсқасын — қазақ немесе орыс тілін — таңдай алады.

«Контент барлық елдер үшін бірдей, бірақ Қазақстанда ол мемлекеттік тілде де қолжетімді», — деп нақтылады компания өкілдері.

Fix Price алдағы уақытта да осындай бастамаларды дамытуды жоспарлап отыр. Бұл барлық қызметкерлер үшін тең жағдай жасап, жұмыс үдерісінде қазақ тілінің кеңінен қолданылуына ықпал етеді.

Fix Price — Ресейдегі ең ірі тұрақты бағадағы дүкендер желісі. 2025 жылдың маусым айындағы мәлімет бойынша, бұл брендпен Ресей мен жақын шетелдерде, соның ішінде Қазақстан, Беларусь және Грузияда шамамен 7 400 сауда нүктесі жұмыс істейді.

2024 жылдың шілде айынан бастап компания Астана халықаралық қаржы орталығында (AIFC) тіркелген, ал оның жаһандық депозитарлық қолхаттары AIX биржасында орналастырылған.