АҚШ пен Иран Ормуз бұғазы бойынша келісімге келді

АҚШ пен Иран Ормуз бұғазындағы жағдайды реттеуге қатысты өзара түсіністік туралы меморандумды әзірлеуді аяқтады, деп хабарлайды Altyn-Orda.kz.

АҚШ президенті Дональд Трамптың мәлімдеуінше, тараптар теңіз жолын қайта ашу және аймақтағы кеме қатынасын қалпына келтіру жөнінде келісімге келген.

Оның айтуынша, келісім Ормуз бұғазы арқылы мұнай танкерлерінің қауіпсіз өтуіне мүмкіндік береді.

Құжатқа 19 маусым күні Швейцарияда қол қою жоспарланған.

Иран Сыртқы істер министрлігі де АҚШ-пен меморандум бойынша жұмыс аяқталғанын растаған.

Келісімнің негізгі мақсаты — Ормуз бұғазындағы теңіз блокадасын алып тастап, аймақтағы тұрақтылықты күшейту. Сарапшылар бұл құжат Таяу Шығыстағы шиеленісті азайтуға ықпал етуі мүмкін екенін айтады.

Ормуз бұғазы әлемдік мұнай тасымалы үшін аса маңызды стратегиялық бағыттардың бірі  болып  саналады.

Сондықтан бұл келісім халықаралық нарық пен жаһандық энергетикалық қауіпсіздік үшін де маңызды оқиға болып отыр.