Ерлан Қарин Қазақстанның алғашқы вице-президенті болып тағайындалды

Президент Қасым-Жомарт Тоқаев Ерлан Тынымбайұлы Қаринді Қазақстан Республикасының вице-президенті қызметіне тағайындады. Тиісті Жарлыққа Мемлекет басшысы 31 тамыз күні қол қойды.

Осыған байланысты Ерлан Қарин бұған дейін атқарған қызметінен босатылды. Ол 2026 жылғы 30 маусымнан бері Президент Әкімшілігі басшысының бірінші орынбасары қызметін атқарып келген.

Вице-президент лауазымы – Қазақстан үшін жаңа институт

Қазақстанда вице-президент қызметі биыл қабылданған жаңа Конституция аясында енгізілді. Жаңа Конституция 2026 жылғы 15 наурыздағы республикалық референдумда қабылданған.

Заңнамаға сәйкес, вице-президентті Президент Құрылтай депутаттарының жалпы санының көпшілік дауысымен берген келісімінен кейін тағайындайды.

Вице-президент Президенттің тапсырмасы бойынша Құрылтаймен, Үкіметпен және басқа да мемлекеттік органдармен қарым-қатынаста Мемлекет басшысының атынан өкілдік етеді. Сондай-ақ Президент белгілеген өзге де өкілеттіктерді атқарады.

Ерлан Қарин кім?

Ерлан Қарин 1976 жылы Түркістан облысында дүниеге келген. Саясаттанушы, саяси ғылымдар кандидаты. Еңбек жолын мектепте тарих және география пәнінің мұғалімі болып бастаған.

Әр жылдары Қазақстан стратегиялық зерттеулер институтын, «Қазақстан» республикалық телерадиокорпорациясын басқарды, Президенттің кеңесшісі және көмекшісі қызметтерін атқарды.

2022 жылдың қаңтарында Мемлекеттік хатшы болып тағайындалып, кейін Мемлекеттік кеңесші қызметіне ауысты. 2026 жылдың маусымында Президент Әкімшілігі басшысының бірінші орынбасары болды.

Ерлан Қарин терроризм және қауіпсіздік мәселелері бойынша сарапшы ретінде де белгілі. Ол қақтығыс аймақтарындағы Қазақстан азаматтарын елге қайтаруға бағытталған «Жусан» операциясына қатысқан.

Осылайша, Ерлан Қарин Қазақстан тарихындағы жаңа саяси институт – вице-президент лауазымына тағайындалған алғашқы тұлға болды.