Фото: El.kz/Арман МУХАТОВ
Жаңа оқу жылынан бастап Қазақстан мектептерінде екі жаңа міндетті пән енгізіледі. Бұл туралы Үкімет отырысында Оқу-ағарту министрі Жұлдыз Сүлейменова мәлімдеді деп хабарлайды Altyn-orda.kz
5–7-сынып оқушылары үшін «Конституция негіздері» пәні оқытылады. Оның аясында оқушылар Қазақстанның конституциялық құрылысы, азаматтардың құқықтары мен міндеттері, мемлекеттік басқару жүйесі және құқықтық мәдениеттің негіздерімен танысады.
Сонымен қатар, 5–11-сыныптарда «Жеке қауіпсіздік» атты міндетті курс енгізіледі. Бұл пәнде оқушыларға өмірлік қауіпсіздік ережелері, кибергигиена, ақпараттық қауіпсіздік, төтенше жағдайларда әрекет ету және түрлі қауіптердің алдын алу бойынша практикалық дағдылар үйретіледі.
Жаңа пәндердің басты мақсаты – оқушылардың құқықтық сауаттылығын арттырып, күнделікті өмірде өз қауіпсіздігін қамтамасыз етуге қажетті білім мен машықтарды қалыптастыру.
