34 блогердің онлайн-казино жарнамасына қатысы бары анықталды

Жыл басынан бері Қаржы мониторингі агенттігі 34 блогердің заңсыз онлайн-ойындарды жарнамалауға қатысы барын анықтады, деп хабарлайды  Altyn-orda.kz    «Адырна» тілшісіне сілтеме  жасап .

Агенттіктің мәліметінше, олардың қатарында Қайсар Қамза, Шыңғысхан Көпбаев («Baller»), Тәуіржан Айтмаханов, Наиль Тұрғанов, Диляра Аманқосқызы, сондай-ақ Зухра Хакиева, Диана Халметова, Әсем Аубакирова, Арина Байкова, Күмісай Айымбетова және өзге де танымал тұлғалар бар.

Жалпы 11 блогер әкімшілік жауапкершілікке тартылған. Ал 23 контент жасаушыға қатысты материалдар Мәдениет министрлігіне жолданды. Агенттік мәліметінше, көптеген блогер заңды бір реттік емес, жүйелі түрде бұзып келеді.

Мәселен, Шыңғысхан Көпбаев («Baller») жыл басынан бері онлайн-казино жарнамасы үшін бес рет жауапқа тартылған. 600 мыңнан астам жазылушысы бар музыкант-блогер Ринат Шамшыраққа да әкімшілік іс қозғалған. Қайсар Қамза өзінің телеграм арнасында заңсыз ойындарды жиі насихаттап, жалған жеңімпаздардың видеоларын жариялап келген. Наиль Тұрғанов – онлайн-казино жарнамасы үшін

8 млн теңгеден астам қаржы алған. Нұрғазы Тоқтаров («Nakonay Qarapaiym») агрессивті жарнама жүргізіп, 15,8 млн теңге пайда тапқан, алайда қаржының жартысына жуығын сол платформаларда ойнап, ұтылып қалған.

Заңсыз жарнамаға қыздар да тартылған. Мариям Құлжабаева («@oomariko») интернет-казинода тіркелуге шақырған стористерін небәрі 350 мың теңгеге бағалаған. Агенттік дерегінше, оның «қарапайым» жарнамасының құрбандары миллиондап шығынға батқан. Сонымен бірге, Зухра Хакиева, Диана Халметова, Әсем Аубакирова, Арина Байкова, Күмісай Айымбетова және тағы басқа блогерлердің есімдері аталды.

Агенттік қазіргі таңда мұндай әрекеттерді ҚР ҚК-нің 28-бабының 5-тармағы бойынша «заңсыз ойын бизнесіне көмектесу» ретінде қарастыруды жоспарлап отыр. Бұған қоса қаржы пирамидаларын жарнамалау кезіндегідей, онлайн-казино жарнамасы үшін де қылмыстық жауапкершілік енгізу бастамасы көтерілді.