17 жастағы алматылық оқушыға 800 мың долларлық келісімшарт ұсынылды

фото 24.kz видеодан кадр 

Алматыда тұратын 17 жастағы оқушы Әлихан Гатаулинге IT және жасанды интеллект саласында білім беретін NeuroKids платформасынан 800 мың доллар көлеміндегі келісімшарт ұсынылды деп хабарлайды Altyn-orda.kz

Жарияланған ақпаратқа сәйкес, жас қазақстандыққа бизнесті дамыту және AI-таланттар жөніндегі директор қызметі ұсынылған.

Алайда келісімшарттың нақты мерзімі, төлем тәртібі және 800 мың доллардың қандай кезеңге есептелгені әзірге ашық дереккөздерде толық көрсетілмеген.

Жасына қарамастан, Әлихан ғылым мен технология саласында бірқатар жетістікке жетіп үлгерген.

Ол қазір SpaceLab ғарыштық стартабындағы ғылыми бағытты басқарады. Жас зерттеуші Күн белсенділігі мен жер сілкіністері арасындағы ықтимал байланысты зерттеп, сейсмикалық қауіптерді алдын ала анықтауға көмектесетін жасанды интеллект моделін әзірлеуге қатысып жүр.

Әлихан NASA ұйымдастыратын Space Apps Challenge байқауының финалистерінің бірі болған. Сондай-ақ ол жасанды интеллект технологияларымен жұмыс істейтін гуманоидты робот жасап шығарған.

17 жастағы оқушының халықаралық компанияларда жетекшілік қызмет атқаруы және ірі келісімшартқа ұсыныс алуы қазақстандық жастардың технология мен жасанды интеллект саласындағы  жетістігін көрсетеді.

Дегенмен 800 мың долларлық ұсыныс туралы ақпарат әзірге негізінен NeuroKids пен әлеуметтік желілердегі жарияланымдарға сүйенеді. Компания келісімшарттың толық талаптарын ресми түрде жариялаған жоқ.